¿Quen é a Federación ?

A Federación de Caza, tal e como recollen os seus Estatutos no artigo 4, é o único órgano lexitimado para representar en materia de caza á Comunidade Autónoma Galega na esfera das súas competencias.

Pola tanto a Federación de Caza é o único organismo que representa e defende os intereses dos cazadores e das sociedades ou asociacións de caza ante as diferentes Administracións e Organismos Públicos e Privados.

En definitiva, a Federación somos tódolos cazadores federados.

¿Que teño que facer para federarme e cal é o carné que me acredita como tal?

Debemos diferenciar un cazador federado a nivel individual dunha sociedade ou asociación de caza, porque os trámites son diferentes en cada caso.

O cazador (individual) para federarse debe dirixirse a calquera sociedade de caza federada –existen na práctica totalidade dos municipios de Galicia- ou á Federación de Caza en calquera das súas delegacións. Basta con aporta-los datos persoais para obte-la licencia federativa, que é o carné que acredita a condición de cazador federado.

A Licencia Federativa ó mesmo tempo é un seguro de danos propios que cubre ó seu titular en accidentes que poida sufrir na práctica da Caza ou actividades deportivas, coas correspondentes indemnizacións e prestacións.

Actualmente, ademais da Licencia Federativa, existen outras variantes de Seguros denominados “Documentos Únicos” que levan incluído ademais da propia licencia federativa un Seguro de danos a terceiros (Seguro de Responsabilidade Civil Obrigatorio do cazador e seguro Voluntario e complementario), e mesmo de Responsabilidade Civil dos cans.

No caso das Sociedades ou asociacións, deben dirixirse en primeira instancia á Federación Provincial que corresponda pola súa ubicación xeográfica. Nas nosas oficinas facilitaráselle todo tipo de información e a documentación necesaria para afiliarse á Federación e inscribirse ó mesmo tempo no Rexistro de Asociacións Deportivas da Xunta de Galicia (modelo de estatutos, impreso de instancias, etc.). O primeiro ano –o ano que causan alta- non teñen que abonar ningunha cota, e nos anos sucesivos deberán satisfacer unha cota anual de 90,00 €uros por sociedade e 0,15 € por socio.

As Sociedades ou asociacións de Cazadores federadas reciben da Federación unha subvención por cada Licencia Federativa ou Documento Único que tramiten.

¿Qué fai a Federación por min?

•  As Sociedades ou asociacións de Caza e os propios cazadores teñen á súa disposición unha ASESORÍA XURÍDICA, a cargo dunha avogada experta en problemas cinexéticos, que os asesora gratuitamente.

•  Servicio de tramitación de LICENCIAS DE CAZA no que se xestionan as Licencias de Caza para calquera Comunidade Autónoma do estado, sen ter que pagar ningunha sobretaxa.

•  As oficinas federativas das catro provincias contan cunha Autorización Especial de Telecomunicacións, ofertando así ós seus afiliados un SERVICIO DE TRAMITACIÓN DE RADIOFRECUENCIA PARA EMISORAS, con varios canais de comunicación.

•  Na provincia da Coruña, a través de convenios privados con gardas de campo, hai a disposición de tódalas sociedades ou asociacións federadas un SERVICIO DE GARDERÍA FEDERATIVA.

•  Agárdase que nun breve espacio de tempo se desenvolva o tema da Gardería previsto no Regulamento de Caza, e desde a FGC espérase atopar para as sociedades a mellor solución a esta necesidade.

O ambicioso proxecto da ESCOLA DE CAZA púxose en marcha fai apenas un ano, en plan experimental, trala sinatura dun convenio coa Consellería de Medio Ambiente para a formación de cazadores, directivos de sociedades ou asociacións, e profesionais relacionados coa Caza. Realizáronse varios CURSOS DE CAZA (Responsables de Tecor, Responsables de Cacería, Lexislación de Caza, Tiradores Expertos, Guías de Axexo, Gardas de Campo de Caza para Tecor e Xornadas de Caza e Comunicación) e espérase no sucesivo poder seguir con estas actividades formativas. A Escola de Caza é itinerante e realiza puntualmente CURSOS DE FORMACIÓN E RECICLAXE DE XUÍCES E ÁRBITROS das diferentes disciplinas deportivas.

•  Representantes da Federación Galega e Provinciais forman parte dos COMITÉS PROVINCIAIS E GALEGO DE CAZA, defendendo a postura e dereitos de tódolos cazadores, tanto na elaboración das Ordes de Vedas anuais como na resolución de problemas que de cotío se presentan no eido cinexético, destacando principalmente a constitución e transformación de tecores (terreos cinexéticamente ordenados), logrando casi a transformación do 100% do territorio galego.

•  En materia de Caza, particularmente no tema dos danos producidos pola fauna cinexética, e dado o aumento producido nos derradeiros anos pola caza maior cos conseguintes danos tanto en colleitas como en accidentes de circulación, a Federación Galega de Caza puxo en marcha un programa piloto de “ BARRERAS DE OLOR ” que se desenvolveu nas catro provincias galegas. A “ Barrera de Olor ” probada –recomendada pola Asociación Automobilística Alemana- reduce e evita os accidentes na estrada producidos por cervos e corzos. A combinación de cheiro, ruído e movemento que utiliza este sistema fai que os cervos e corzos non se acerquen nin crucen a estrada evitando así os sinistros, sen producir que as especies escapen do couto, xa que a sensibilización do animal concéntrase unicamente no borde da estrada.

•  Seguindo coa problemática dos danos ocasionados polas especies cinexéticas na estradas, e en convenio coa Consellería de Medio Ambiente, estanse a realizar ensaios nos puntos de maior sinistrabilidade da Comunidade Autónoma mediante a utilización de BARREIRAS LUMINOSAS, consistentes na reflexión da luz que emiten os faros dos automóbiles nuns postes recubertos de espellos e colocados ó efecto nas marxes das vías de comunicación.

•  Desde a Federación tramítanse SEGUROS DE RESPONSABILIDADE CIVIL PARA OS TECORES, buscando a mellor solución e oferta para cada caso concreto

•  Infórmase puntualmente ás sociedades da publicación das diferentes ordes de AXUDAS E SUBVENCIÓNS , tanto da Xunta de Galicia como dos Organismos Provinciais, asesorándoas na tramitación das mesmas.

•  As sociedades ou asociacións de caza federadas reciben –tódolos meses- de xeito totalmente gratuíto a REVISTA FEDERCAZA e a REVISTA CAZA E PESCA GALEGA

•  No que ás INFRAESTRUCTURAS se refire, salientar que a sede central da Federación Galega de Caza desde o ano 1996 contan cunhas amplías e modernas instalacións federativas no Estadio Multiusos de San Lázaro, en plena capital de Galicia, centro neurálxico da Comunidade Autónoma, onde están ubicadas varias sedes doutras institucións, federacións, e clubs deportivos. Ademais, desde a súa constitución, conta con OFICINAS FEDERATIVAS EN TÓDALAS PROVINCIAS , conectadas entre si informáticamente, e persoal altamente cualificado en todas elas. Fixéronse grandes avances no eido das NOVAS TECNOLOXÍAS para poder ofertar un mellor e máis rápido servicio ás demandas dos cazadores e asociacións, podendo deste xeito realiza-los trámites e xestións en calquera das provincias galegas nas que se atope, sen necesidade de acodir á Federación de residencia.

•  A Federación posue unha PÁXINA “WEB” ( www.federaciongalegadecaza.com ), actualizada permanentemente por persoal informático da propia Federación, onde se pode atopar gran variedade de información de interese para os cazadores e sociedades. Tanto a Federación Galega como as Provinciais xa dispoñen de Correo Electrónico desde fai varios anos, e son numerosas as consultas e trámites que se reciben a través deste medio.

•  Como alternativa á Caza cinexética, existen as COMPETICIÓNS DEPORTIVO-CINEXÉTICAS –competencia exclusiva da Federación- nas que poden participar os deportistas federados, nas diferentes fases (Campionatos Provinciais, Galegos, Semifinais, Campionatos de España e Internacionais) e modalidades (Paxariles, Recorridos de Caza, Percorridos en Cancha, San Huberto, Cans de Parada, Cans de Rastro sobre coello, Rastro de Xabaril, Caza Menor con Can, Arceas, Raposo, Percorridos de Caza con Arco, Caza con Arco ó Voo e Cetrería). Aqueles deportistas que se clasifiquen nos diferentes campionatos provinciais representarán á súa provincia no Campionato Galego, e a selección provincial contará coa inscricións subvencionada pola Federación Provincial. Os concursantes que se clasifiquen nos diferentes Campionatos Galegos acodirán ás Semifinais e Campionatos de España subvencionados pola Federación Galega, e no caso de clasificarse para formar parte da Selección Española participarán nos Campionatos Internacionais (Campionatos de Europa e/ou Campionatos do Mundo) tamén subvencionados.

•  Os representantes das sociedades ou asociacións, os cazadores federados, e os xuíces e árbitros, tal e como establecen os vixentes Estatutos federativos, teñen DEREITO A ELIXIR OU SEREN ELIXIDOS PARA OS ÓRGANOS DE GOBERNO E REPRESENTACIÓN DA FEDERACIÓN . Dentro do organigrama federativo (Asemblea Xeral, Comisión Delegada, Presidente, Xunta Directiva, Comisión Executiva, Secretario Xeral, Tesoureiro) existen diversos órganos técnicos e asesores (Comité de Disciplina Deportiva, Comité de Xuíces e Árbitros, etc) entre os que merece especial mención o COMITÉ DE CONCILIACIÓN E MEDIACIÓN, que ten por obxecto mediar ante conflictos, intentando un achegamento das partes, antes de instruír expedientes disciplinarios.