Benvidos á vosa Federación, aínda que sexa de xeito virtual.

A Federación, dende sempre e agora máis que nunca, ten a vocación de ser ese lugar de encontro de sociedades de caza e cazadores galegos. Esta  xa é unha casa grande, pero ten a vocación de ser unha obra inacabada para poder acoller a todo aquel que queira botar a súa xeira pola caza, para que tódolos cazadores facendo causa común do moito que nos une poidamos presentar unha voz única ante a sociedade para expoñer e defende-la nosa actividade de xeito cabal.

Como é ben coñecido, o sentir da Federación está na defensa dunha caza social, asentada sobre sociedades de caza fortes, que non é sinónimo só de grandes, ben xestionadas, sustentables nunha palabra. Defendemos un cazador responsable, que practica unha actividade ancestral, pero con criterios do século XXI, onde a caza é sobre todo unha actividade deportiva que se desenvolve na natureza e con gran respecto para ese medio natural.

É o noso desexo que a través desta paxina poidamos achegar a tódolos cazadores e sociedades de caza información abundante e recibir as súas inquedanzas, así como tentar ser unha ferramenta útil e áxil que simplifique e facilite determinados trámites. Esperamos que no futuro cada vez poidamos axudar a resolver mais cousas a través deste espacio virtual.

Anímate, fainos as túas suxerencias, apórtanos a túa visión das cousas, proponnos as solucións que entendas axeitadas. Pensa que a túa opinión tamén é importante.

Convídote a que camiñemos xuntos, por un camiño que sintamos noso porque o fagamos entre todos.

José María Gómez Cortón
PRESIDENTE