O Comité Policial Antiincendios acordou esta semana desenvolver unha investigación policial e forestal nas parroquias consideradas como zonas de alto risco de incendios, co obxectivo de analizar a existencia ou non de conflitos ou outras causas que poidan provocar incendios, así como potenciais situacións de risco. A partir dos resultados da investigación avaliarase a posibilidade de establecer zonas de especial vixilancia nas parroquias máis afectadas polos incendios.
Esa foi unha das conclusións do comité desenvolvido esta semana, no que participaron os integrantes do ente, que está composto por representantes da Xunta, da Delegación do Goberno, da Fiscalía de Medio Ambiente e das Forzas e Corpos de Seguridade que operan en Galicia. O comité estivo coordinado polo director xeral de Montes, Tomás Fernández-Couto, quen defendeu a necesaria actualización das zonas de alto risco de incendios de Galicia, "buscando sempre a optimización dos medios".
"A casuística ten oscilacións e periodicamente vaise adecuando á realidade", defendeu Fernández Couto, quen explicou que o obxectivo da reunión foi determinar as parroquias con alto risco de incendios, que se fixan analizando os datos dos últimos dez anos. As zonas serán incluídas no plan de defensa contra incendios 2010. Deste xeito, Fernández-Couto sinalou que se pon en marcha unha medida para a investigación sistemática duns incendios que "nunha alta porcentaxe son provocados", recalcou.
As zonas de alto risco, aprobadas por Medio Rural, considéranse prioritarias na aplicación de medidas máis rigorosas de defensa contra os incendios, pola especial frecuencia ou virulencia destes.
Do informe analizado no comité despréndese que preto de 200 parroquias galegas non rexistraron ningún incendio forestal nos últimos dez anos, así como que máis da metade dos lumes concéntranse no 25 por cento do territorio galego.
Despregados tres avións e dez helicópteros
Doutra banda, o Comité Policial Antiincendios abordou na súa xuntanza os resultados alcanzados no que vai de ano na loita contra os incendios, así como o dispositivo posto en funcionamento pola Consellería de Medio Rural, que supuxo o despregamento do persoal fixo e fixo descontinuo, reforzado co funcionamento de tres avións de carga en terra, dez helicópteros de extinción do Executivo autonómico e dous do Goberno central.
