O vindeiro 9 de marzo, daranse cita no concello coruñés de Ames as mellores deportistas galegas de tódalas modalidades, para celebra-la segunda edición da Gala do Deporte Feminino, no que por segundo ano consecutivo a Federación Galega de Caza tamén estará presente.
Durante a Gala farase entrega dos premios ás mellores deportistas galegas, aos que a FGC ven de presenta-la súas candidatas, que, paradóxicamente, a pesar de que no deporte cinexético non son numerosas as donas que o practican, resultou difícil a designación das mellores candidatas porque as poucas féminas cazadoras contan maioritariamente cun importante currículo no seu haber; finalmente, a xunta executiva da federación, determinou propoñer ás seguintes:
- Mellor Directiva: Cristina Sanmartín Porca (Ferrol, A Coruña), Presidenta do Clube Amigos dos Cans de Caza e Vocal da Federación Galega de Caza na Coruña.
- Mellor Deportista: Dolores Bugarín Codeseda (Redondela, Pontevedra), deportista da selección galega de Percorridos de Caza con Arco, actual campioa galega, e Provincial (A Coruña e Pontevedra), así como 5ª clasificada no pasado campionato de España.
- Mellor Deportista Promesa: Rebeca Villaverde Bugarín (Redondela, Pontevedra), deportista cadete (12 anos) da modalidade de Percorridos de Caza con Arco, actual subcampioa autonómica.
- Premio á Traxectoria: Ana Isabel Arbiol Ledesma (Palas de Rey, Lugo), Deportista da selección galega de San Huberto, cun amplo palmarés a nivel internacional, nacional e autonómico.
- Mellor Xuíza: Isabel Negreira Chaves (Santiago, A Coruña), xuíza autonómica de cans de rastro, e experta no adestramento dos cans desta modalidade.
- Mellor iniciativa a prol do deporte: Monteiros Galaicos (Cea, Ourense), pola organización dunha montería exclusivamente feminina.
