TEMPADA 2012/2013
Acordos do Comité Galego de Caza
16/5/2012

No serán de onte día 15 de maio, tivo lugar a xuntanza do Comité Galego de Caza, cuios acordos servirán de base para confeccionar a “Orde de Vedas” que regula os períodos hábiles de caza das distintas especies cinexéticas para a inminente tempada de caza.

Dito Comité estivo composto polos diferentes representantes dos cazadores galegos, entre os que se atopaba Ramón Rodríguez, Secretario Xeral da FGC e os catro presidentes provincias da Federación Galega de Caza, todos eles encabezados polo seu presidente, Javier Nogueira Diz. Diferentes asociacións de caza e representantes das administracións provinciais e autonómica tamén estiveron presentes, todos eles baixo a presidencia de Ricardo García Borregón Millán, Director Xeral de Conservación da Natureza.

No transcurso da reunión, analizáronse as propostas dos catro comités provinciais para establecer a normativa que regule os períodos hábiles e as especies que serán obxecto de caza na vindeira tempada. Destacando a importancia que adquirirá o control das poboacións do xabaril, para evitar ou cando menos minimizar os danos que este animal causa nos cultivos.

Como posibles datas, o comité fixou para o inicio da tempada xeral o día 21 de outubro e o 18 de agosto para a apertura da caza do xabaril.

Quedando todo emprazado a que sexa o Conselleiro do Medio Ambiente e Infraestruturas o que fixe, ca publicación da Orde de Vedas, as regras que suxeitaran a práctica cinexética na nosa comunidade.