XXXVII Campionato de España de Percorridos de Caza - Grand Prix FITASC

Esta pasada fin de semana disputouse en Castillejo de Robledo – Soria, a XXXVII edición do Campionato de España de Percorridos de Caza organizado pola Real Federación Española de Caza.

Ata terras casteláns desprazáronse un total de 18 tiradores galegos máis o presidente da Federación Galega de Caza Javier Nogueira, para tentar deixar a nosa comunidade onde se merece no que o tiro se refire.

Todo daba comezo o venres día 24 cando os primeiros pratos facían as primeiras traxectorias deste Campionato de España no que competiron un total de 281 tiradores sobre 200 pratos divididos en 8 canchas.

Da actuación da representación galega neste campionato temos que destacar a Artemio Formoso Barro o se converter en Campión de España na categoría de Handisport e a Ángel Mosquera Rodríguez por acadar o subcampionato en superveteranos. Artemio obtivo unha ampla vantaxe sobre o segundo clasificado e a Ángel Mosquera, as elevadas temperaturas e pequenos problemas físicos, relegárono o segundo posto despois de disputar o desempate para o primeiro posto co canario Olegario Rodríguez Fajardo.

Foi o aragonés Juan Carlos Navarro Asín o que subiu o máis alto do podio na clasificación xeral con 186 + 23 pratos escachados sendo deste xeito o novo Campión de España da modalidade seguido polo madrileño Jaime Valentín Vara con 186 + 18 pratos. O terceiro posto foi ocupado polo navarro Miguel Lucea Villanueva con 185 pratos.

Ata o posto 25 da clasificación xeral temos que baixar para ver o primeiro tirador galego, Antonio Iglesias Otero cun total de 174 pratos escachados.