Durante a disputa do torneo, de ámbito nacional, na vila viviuse un pulso entre ecoloxistas e cazadores, contando estes últimos co apoio dos gandeiros locais, que se manifestaron polas rúas de Portomarín para defender a caza como medio de control das alimañas.
Con motivo da proba, uns 200 activistas polos dereitos dos animais boicotearon a competición mediante o emprego de chifres e outros obxectos para facer ruído co que espantar aos raposos.
Aínda que a xornada reivindicativa foi menos tensa que en edicións anteriores deste mesmo torneo e pechouse sen altercados graves, sete dos integrantes de Equanimal deberán presentarse o día 30 nos xulgados de Chantada, imputados por desobediencia á autoridade.
Segundo aseguraron desde este colectivo a través dun comunicado, as multas que se lles poden impor oscilan entre os 50 e os 300 euros e, en caso de falta de pagamento, exponse a arrestos domiciliarios.
O portavoz de Equanimal, Eneko Pérez, apuntou, ademais, que outros 25 activistas foron multados por salvar «a vida dos raposos». Cada unha desas sancións foi de 60 euros, engadiu.
A pesar das sancións, o colectivo mantén que non deixará de levar a cabo «de forma pacífica o que sexa necesario para salvar vidas e difundir o respecto cara a todos os animais», apuntou Eneko Pérez. |