O Parlamento Europeo aproba un regulamento de trazabilidade de cans e gatos con impacto no sector cinexético

O Parlamento Europeo deu luz verde ao novo regulamento sobre o benestar e a trazabilidade de cans e gatos, unha normativa que culmina a súa tramitación na Unión Europea e que terá implicacións para o sector cinexético español. O texto foi aprobado por 558 votos a favor, 35 en contra e 52 abstencións, co PSOE votando a favor, o PP optando pola abstención e VOX posicionándose en contra.

O texto ten por obxecto principal combater a cria ilegal de animais e regular a súa comercialización. No entanto, algúns aspectos do seu articulado poderán afectar a calquera propietario de cans que realice determinadas actividades de cría. 

A Real Federación Española de Caza (RFEC) foi crítica co texto desde a súa primeira redacción, e solicitou a exclusión explícita dos cans de caza e as realas do ámbito de aplicación. A Federación alertaba nas súas emendas que a distinción entre pequenos criadores e criadores comerciais é insuficiente, e pode xerar inseguridade xurídica nun sector complexo como o da caza, ao non delimitar con claridade a cria non comercial da actividade económica.

Así mesmo, a Federación alerta de que unha interpretación exhaustiva da norma podería impoñer obrigacións desproporcionadas a cazadores sen actividade comercial, insistindo en que as esixencias máis estritas deben centrarse exclusivamente en operadores profesionais.

As alegacións da RFEC, conxuntamente coas achegadas pola Federación Europea para a Caza e a Conservación (FACE), orientadas a minimizar o impacto da normativa sobre a actividade cinexética, conseguiron o apoio dos principais comités consultivos. Grazas a iso, o texto incorpora concesións ao sector da caza, como a exclusión da cria puntual do concepto de comercialización, a posibilidade de realizar o corte do rabo por motivos sanitarios conforme a normativa nacional e a non afección ao uso de colares eléctricos en cans que non se comercialicen.

No entanto, a exclusión do ámbito de aplicación non superou os trámites parlamentarios e os cans de caza deberán observar as disposicións xenéricas.

O presidente da RFEC, Josep Escandell, sinalou que “traballamos para evitar que esta norma penalice aos cazadores, defendendo unha regulación proporcionada que diferencie claramente entre cría comercial e cría por afeccionados sen fins lucrativos. Pero unha vez máis, a lexislación europea demostrase incapaz de integrar as singularidades do campo español”.

A RFEC continuará traballando no seu desenvolvemento para garantir que a súa aplicación en España respete a realidade do sector e non supoña cargas innecesarias para os propietarios de cans de caza. O regulamento entrará en vigor tras a súa publicación oficial e será aplicable nun prazo aproximado de dous anos.

PUNTOS CLAVE

1-Distinción de criadores

Aplícase a distinción entre pequenos criadores (ata dúas camadas por ano natural) e os criadores (máis de dúas camadas por ano natural).

2-Identificación e rexistro

Todos os cans e gatos, xa se atopen nunha tenda, un refuxio ou un domicilio particular, deben levar un microchip e estar rexistrados. A maioría dos países europeos xa esixen isto para os cans.

3-Comercialización

O texto definitivo exclúe claramente as doazóns esporádicas e irregulares da definición de «comercialización» (é dicir, venda, oferta de venda, distribución ou calquera outra forma de transferencia de propiedade). Isto é fundamental para garantir que as actividades ocasionais e non comerciais queden fóra do ámbito de aplicación do Regulamento. Esta foi unha petición importante de FACE e a RFEC.

4-Obrigacións de benestar para os pequenos criadores

Aínda que os pequenos criadores están suxeitos a requisitos menos estritos, deben cumprir, no entanto, cunha serie de obrigacións mínimas de benestar animal. Estas obrigacións aplícanse a todos os criadores e aos propietarios de cans que crían, venden ou doan cans, independentemente da escala da actividade.

5-Uso de colares de impulsos eléctricos

En moitos países europeos utilízanse colares de impulsos eléctricos nos cans de caza para completar o seu adestramento e modificar certas condutas. Esta nova lei non afectará o uso de colares de impulsos eléctricos en cans que non se comercialicen.

6-Corte do rabo

O texto inclúe unha disposición positiva que confirma que o corte do rabo pode realizarse por motivos hixiénicos cando sexa necesario para preservar a saúde do can, de conformidade coa lexislación nacional. Este é outro punto importante solicitado por FACE para garantir que se poida evitar o sufrimento innecesario dos cans que traballan en zonas de vexetación densa e corren o risco de sufrir lesións no rabo.

7-Requisitos de iluminación e temperatura

O texto definitivo substitúe a referencia á escuridade por un requisito de oito horas sen luz artificial e elimina os umbrais específicos de temperatura interior para os cans adultos, adoptando un enfoque máis adecuado ás diversas condicións climáticas e xeográficas dos Estados membro.