O Salón de Actos da Facultade de Ciencias Sociais e da Comunicación do Campus de Pontevedra da UVI foi hoxe escenario dunha conferencia sobre deporte na que participou o Presidente da FGC.

Baixo o título Promoción do ‘Deporte que non é deporte’, a Universidade de Vigo organiza unhas xornadas que durante o día de hoxe e ata mañá tratarán de achegar aos asistentes a realidade de diversos deportes que pola súa especial natureza non sempre son vistos como tal a ollos da masa social. Xadrez, futbolín, bridge, pesca e caza son algúns dos deportes que son analizados nestas Xornadas da Comunicación e do Deporte que alcanzan este ano a súa quinta edición.

Javier Nogueira, Presidente da Federación Galega de Caza, ofrecía esta mañá ás 11.45h unha conferencia titulada “¿É a caza un deporte? Organización dos seus eventos dende a Federación Galega”, coa que pretendía por en releve os importantes valores deportivos, sociais e mesmo económicos da actividade cinexética.

A exposición de Nogueira xiraba en torno a dous bloques principais: amosar que a caza é un deporte e presentar as distintas modalidades e eventos que organiza a nivel deportivo a Federación Galega de Caza.

O Presidente federativo recalcaba a realidade deportiva da caza mediante as diferentes definicións que do deporte existen, tanto dende o punto de vista académico-lingüístico como dende o lexislativo-legal. Por exemplo, a Real Academia Española define o deporte como “[...] actividad física, ejercida como juego o competición, cuya práctica supone entrenamiento y sujección a normas” ou unha “Recreación, pasatiempo, placer, diversión ou exercicio físico, polo común ao aire libre”, descricións ambas, que se acomodan perfectamente á esencia da caza.

Tamén salientaba a importancia da caza a nivel social e económico, como sector con máis importancia económica no ámbito rural e un dos máis puxantes dentro da economía galega. Ademais, lembraba que a caza é a actividade deportiva máis practicada no rural, ademais dun importante motor dentro do turismo rural, como alternativa ao turismo estival.

Na segunda parte da conferencia, Nogueira facía un repaso ás competencias da Federación Galega de Caza no terreo da competición cinexética, como a exclusividade da organización de tódolos eventos deportivos relacionados coa caza, ao tempo que percorría as distintas modalidades nas que se encadran as súas probas deportivas.

A conferencia do responsable da FGC concluía cunha completa referencia ao importante palmarés competitivo dos deportistas cinexéticos galegos, tanto a nivel nacional como internacional, con máis de 20 metais acadados no último ano, e á importancia do deporte cinexético no ámbito social e rural, só superado en número de federados polo Fútbol.

Rematada esta primeira xornada, o Presidente, en nome da Federación Galega de Caza, desexa dar as grazas aos asistentes pola súa acollida e á Universidade de Vigo por contar coa caza para estas xornadas, pois sen dúbida este tipo de iniciativas axudan a dar a coñecer en maior medida o noso deporte á sociedade.