Na proba participaron un total de 19 lotes chegados de Galicia, Asturias e Cantabria
 
Os cans conducidos por Antonio Castro, de Ferrol, proclamábanse campións da IV Copa Federación de Cans de Rastro sobre Xabaril, que se celebrou o pasado sábado día 26 de maio nos Tecores das Sociedades de Cazadores Ortegal e Cedeira. Esta proba estivo organizada pola Federación Galega de Caza en A Coruña contando coa colaboración de ditas Sociedades de Caza. O segundo posto foi para o cazador de Cedeira, Andrés Toxeiro, e o terceiro era para o cántabro Luis Felipe Martínez.

Os trofeos para os dous mellores cans recaeron en Lassie e Larry, unha griffona e un cruce de griffón e o terceiro posto repartírono os cans Cuco, Sil, Killo e Pinto, dous griffóns, un cruce de griffón e un sabueso,  todos eles propiedade do gañador da proba, Antonio Castro.

Presentábanse nesta edición un total de 19 lotes de cans procedentes de toda Galicia así como das comunidades veciñas de Asturias e Cantabria, así como un gran número de público que se concentraba tanto a primeira hora para acompañar aos participantes e disfrutar do traballo dos cans, como ao acto de clausura que tiña lugar nunha carpa habilitada no polígono de Ortigueira, e ao que acudían, entre outras autoridades, o Presidente Provincial da FGC, Manuel Saa, o Alcalde de Ortigueira, Rafael José Girón , o Alcalde de Cedeira, Leopoldo Rubido, así como os Presidentes das Sociedades anfitrioas, José Manuel López, da Sociedade de Ortigueira, e Enrique Losada da Sociedade de Cedeira.