Os montes de Dozón e máis concretamente a zona de Sanguiñeda, acollían o pasado día 15 de xuño o Campionato Galego de Cans de Rastro do Xabaril. Contenda autonómica organizada pola Federación Galega de Caza e a Sociedade de Caza de Dozón, que era clasificatoria para a final de España da especialidade que terá lugar proximamente en terras burgalesas.
A proba foi xulgada polos titulares Guillermo Barreira (Terra Chá), Eduardo Casal (Anta de Ulla), Mario Díos (Camariñas) e Alfonso Collazo (Noia), actuando como auxiliares, Rafael Otero (Meaño) e Lelo Arnoso (Monfero).
A participación ascendeu a 30 monteiros e outros tantos cadelos previamente clasificados nas fases anteriores. Unha vez desputada a fase clasificatoria pasaron para a fase final do autonómico un total de 10 monteiros.
Consumido a primeiro ciclo deuse un descanso para repoñer forzas a través dun “tente en pé”, antes de pasar a disputar a final a decena de participantes que superaron a criba (cinco de cada acampo), quedando a clasificación definitiva do seguinte xeito:
1º e campión, Sebastián Martinez, con “Pumuki” e 237,5 puntos
2º e subcampión, Manuel Rodeiro, con “Rato” e 216, 5 puntos
3º, Adolfo Vázquez, con “Samba” e 215,75 puntos.
4º, Martín Martínez, con “Camarón” e 214 puntos
5º, Maikel Otero, con “Chacho” e 213,75 puntos
6º, José Manuel Fernández Vecino, con “Zulú” e 193 puntos.
7º, José Luís Mera, con “Ali” e 188 puntos.
8º, José Manuel Barreiro, con “Brisa” e 184 puntos.
9º, Álvaro Fontela, con “Muchachita e 162 puntos.
10º, Iván López, con “Rubia” e 113,5 puntos.
Os cinco primeiros, xunto con Salvador Sestelo e José Manuel Barreiro, que foron os mellores na Copa de Galicia desta mesma modalidade, formarán o equipo que representará a Galicia na Final de España.
Salientar tamén, que esta “clásica” dentro do calendario federativo galego, contou cunhos campos moi homoxéneos e piropeados polos protagonistas, concluíndo na Praia Fluvial de Dozón cun xantar campestre e a entrega de agasallos, premios e placas acreditativas. Presidindo a cerimonia o Vicepresidente da FGC, Luís Eusebio Fidalgo, quen lle agradeceu á Sociedade locataria a colaboración e os organizadores o importante traballo realizado, para rematar felicitando os gañadores en particular e a todos en xeral “por saber compartir o día e a deportividade cos demais”.
Pola súa banda o campión, que foi cuarto no provincial de Pontevedra, amosouse satisfeito polo bo facer do can e e pola clasificación, pero tamén botou man da “sorte” para definir o resultado final.
