A Comisión Europea amplía a cinco anos o prazo para retirar o chumbo en cartuchos, aínda que o sector cinexético considérao insuficiente

A Real Federación Española de Caza cualificou como “insuficiente” a mellora introducida polo Comité REACH da Comisión Europea na súa proposta sobre a prohibición do chumbo. O novo texto establece un prazo de cinco anos para retirar os perdigóns en caza menor e tiro deportivo e, polo momento, deixa fóra do ámbito de prohibición as balas de calquera calibre.

A Federación recoñece un avance respecto á formulación inicial —que contemplaba a prohibición dos cartuchos en apenas 18 meses e a retirada da munición metálica en tres e cinco anos—, froito da presión de varios Estados membro e do traballo técnico desenvolvido polo sector nos últimos anos. No entanto, advirte de que os prazos seguen sen ser realistas.

A RFEC insiste en que, hoxe en día, non existe unha alternativa ao chumbo que sexa viable desde o punto de vista técnico, económico e de dispoñibilidade. Por iso, considera que calquera período transitorio será insuficiente se non vai acompañado dunha solución real que garanta a seguridade, a eficacia e un custo asumible para os cazadores.

Ademáis, alerta de que a exclusión actual da munición metálica pode ser “unha arma de dobre fío”: aínda que supón un alivio inmediato para a caza maior, non impide que a súa prohibición volva exporse nun futuro próximo, tal e como prevé a propia Comisión Europea.

O impacto dunha transición acelerada sería moi elevado. Segundo un estudo de Euractiv para a Federación Europea de Tiro Deportivo (ESSF) baseado en máis de 18.000 enquisas, un 25% dos cazadores abandonaría a actividade e un 30% reduciríaa. A iso súmase que preto de medio millón de escopetas en España poderían non ser compatibles con alternativas como o aceiro, xerando un importante impacto económico e social.

Por todo iso, a RFEC subliña que non se opon ao cambio de material, pero si a un proceso sen garantías, e reclama un período transitorio de polo menos 10 anos que permita adaptar o sector de forma progresiva e viable.

A RFEC critica a actuación do Goberno de España, e en particular do Ministerio para a Transición Ecolóxica e o Reto Demográfico (MITECO), por manter durante toda a tramitación unha posición aliñada coas formulacións máis restritivas, sen atender as solicitudes de reunión nin as achegas técnicas do sector.

A Federación denuncia que, fronte a esa postura, non se traballou en garantir unha transición real: non se definiron alternativas viables, non se consultou coa industria armeira nin cos cazadores, nin se expuxeron medidas como incentivos para a renovación de armas ou a xestión dos stocks existentes.

En palabras do presidente da RFEC, Josep Escandell, esta posición resulta “incomprensible”, xa que ignora dúas realidades crave de España: “a necesidade de dispoñer de grandes cantidades de munición para o control de especies como o coello ou o xabarín, e as condicións da nosa caza, que se desenvolve en terreos onde alternativas como o aceiro poden supoñer un problema de seguridade”.

A proposta será votada previsiblemente en xuño polos Estados membro e, en caso de saír adiante, podería elevarse ao Parlamento Europeo en setembro, cunha eventual entrada en vigor non antes de 2027. A RFEC continuará traballando para ampliar os prazos e advirte de que xa prepara a súa estratexia no Parlamento Europeo para garantir que a futura normativa non prexudique á actividade cinexética en España.