A Consellería do Medio Rural publicou no DOG do pasado venres 28 de maio a Orde do 19 de maio de 2010 pola que se establecen as bases reguladoras para a concesión de axudas a actividades, actuacións ou medidas de concellos incluídos na Rede Natura 2000 e a súa convocatoria para os anos 2010 e 2011.
O obxecto desta orde é regular as bases do réxime de axudas para a execución de medidas, accións ou actividades que permitan a mellora da paisaxe, o mantemento das condicións ambientais ou recuperación de especies historicamente relacionadas coa actividade agraria en zonas da Rede Natura 2000, así como a conservación e/ou restauración de elementos históricos patrimoniais ou culturais representativos da paisaxe agraria tradicional, coa finalidade de incrementar, nas explotacións agrícolas, o valor de recreo público das zonas Natura 2000.
Poderanse acoller ás axudas desta orde os concellos que teñan, toda ou parte da súa superficie, na Rede Natura 2000, na súa condición de entidades xestoras destas superficies. As ditas entidades locais deberán concorrer individualmente, admitirase unha única solicitude e proxecto por concello, e deberase indicar expresamente na solicitude a acción que se vai desenvolver e o investimento que se realizará correspondente á acción para a cal se solicita.
A Rede Natura 2000 ten como obxectivo principal asegurar o mantemento nun bo estado de conservación das mellores manifestacións da biodiversidade europea, ideada tamén para fomentar o equilibrio harmónico entre as actividades sociais e económicas que neles se levan a cabo e a calidade de vida das persoas que os habitan. Está conformada por dous tipos de áreas: zonas de especial protección para as aves (ZEPA) e lugares de interese comunitario (LIC).
Na actualidade, a Rede Natura 2000 está representada en Galicia, ademais das ZEPA, por 59 lugares de importancia comunitaria (LIC), que suman unha superficie total de 374.405 ha, das cales unhas 29.000 ha corresponden a áreas mariñas. A extensión terrestre dos LIC representa o 11,6% da superficie de Galicia. A maioría dos espazos sitúanse na rexión bioxeográfica atlántica (49 LIC), catro están na rexión mediterránea e seis repártense entre ambas as dúas rexións, abranguendo no seu conxunto unha variada mostra de ecosistemas costeiros, fluviais e de montaña, entre outros.
